[东方报]英超：護級生死戰錘仔大無畏[04-10]

码头仔生蚝

今晚英超護級大戰，韋斯咸主場惡鬥狼隊。兩隊同樣喺降班區內，今場輸波一方隨時下季英冠見，打和就等同「攬炒」，兩隊冇得選擇惟有豁出去搶攻。參考近6次正式賽事交手，5次總入球開3球或以上，中位數2.5球入球大追得過。（Now 621周六凌晨3時直播）

韋斯咸現時排第18位，僅落後17位嘅熱刺1分，剩番7場聯賽護級未算絕望，前提當然係要贏波。「錘仔幫」主場偶有驚喜，試過打和曼聯及曼城，遇上包尾嘅狼隊，真係唔搶等幾時，肯定主動出擊。射手查洛保雲近期腳風麻麻，仍然幫到隊友鋪橋搭路，近6次英超上陣貢獻4次助攻，有呢位英格蘭國腳策動攻勢，相信卡斯迪蘭奴斯及湯馬士蘇錫克等射手搵到食。

狼隊包艇鬥志未減
榜尾狼隊落後尾4熱刺13分，護級機會渺茫，但球員鬥心未減，仲有超水準發揮，2月打和過榜首阿仙奴2比2，以2比0擊敗阿士東維拉，上月初贏利物浦2比1，上場英超作客打和賓福特2比2，近6場聯賽取得2勝3和1負。此外，佢哋近3次對韋斯咸贏晒，包括首循環主場淨勝3比0，心理上有優勢，預料作客照樣駁火，有望合演入球騷。